პალეონტოლოგიური მუზეუმი გამოჩენილი მეცნიერის, აკადემიკოს ალექსანდრე ჯანელიძის ძალისხმევით შეიქმნა თბილისის სახელმწიფო უნივერსიტეტის გეოლოგიისა და პალეონტოლოგიის კათედრაზე. 1924 წელს კათედრის ჩამოყალიბებაც მის სახელს უკავშირდება. პალეონტოლოგიის მუზეუმის შევსება გეოლოგიის ინსტიტუტისა და კათედრის თანამშრომელთა მიერ საქართველოს სხვადასხვა რეგიონში შეგროვებული ნამარხი ორგანიზმების კოლექციების ხარჯზე მოხდა, რომელთა მცირე ნაწილი ჩრდილოეთ კავკასიის (ძირითადად დაღესტნის), ამიერკავკასიის, საფრანგეთისა და ესპანეთის რეგიონებიდანაა ჩამოტანილი.პალეონტოლოგიურ ფონდში დაცული ნამარხი ფაუნისა და ფლორის კოლექციები სხვადასხვა მეცნიერთა მიერ არის შესწავლილი და მონოგრაფიების სახითაა გამოქვეყნებული. აქ დაცულია აკადემიკოსების: ა. ჯანელიძის, ი. კახაძის, ა. ცაგარლის, პროფესორების: ი. რუხაძის, მ. უზნაძისა და სხვა მრავალი მეცნიერის კოლექცია.
პალეონტოლოგიურ ფონდში მიმდინარეობს როგორც სასწავლო, ისე სამეცნიერო მუშაობა. აქ დაცულ მასალას შეისწავლიან გეოლოგიური სპეციალობის ბაკალავრიატის, მაგისტრატურისა და დოქტურანტურის სტუდენტები, აგრეთვე სხვა დაინტერესებული მკვლევარი თუ დამთვალიერებელი.
