ფაკულტეტის დებულება

სსიპ - ივანე ჯავახიშვილის სახელობის
თბილისის სახელმწიფო უნივერსიტეტი

სოციალურ და პოლიტიკურ მეცნიერებათა ფაკულტეტის
დებულება

თავი I
ზოგადი დებულებები

მუხლი 1. ფაკულტეტის სტატუსი

1. სსიპ -ივანე ჯავახიშვილის სახელობის თბილისის სახელმწიფო უნივერსიტეტის (შემდგომში„უნივერსიტეტი“) სოციალურ და პოლიტიკურ მეცნიერებათა ფაკულტეტი (შემდგომში „ფაკულტეტი“) წარმოადგენს უნივერსიტეტის ძირითად სასწავლო-სამეცნიერო და ადმინისტრაციულ ერთეულს, რომელიც უზრუნველყოფს სტუდენტთა მომზადებას ერთ ან რამდენიმე სპეციალობაში და მათთვის შესაბამისი კვალიფიკაციის მინიჭებას.
2. ფაკულტეტი ვალდებულია, შეუქმნას სტუდენტს პირობები სწავლისა და დამოუკიდებელი კვლევისათვის, უზრუნველყოს თანამედროვე სტანდარტების შესატყვისი, მომავალზე ორიენტირებული განათლების მიღების შესაძლებლობა და მუდმივად იზრუნოს სასწავლო პირობების გაუმჯობესებაზე.
3. ფაკულტეტის სამართლებრივი სტატუსი განისაზღვრება საქართველოს კანონმდებლობით, წინამდებარე დებულებითა და თსუ წესდებით.

მუხლი 2. დებულების მოქმედების სფერო

1. წინამდებარე დებულება განსაზღვრავს სოციალურ და პოლიტიკურ მეცნიერებათა ფაკულტეტის სტრუქტურას, მისი სტრუქტურული ერთეულების საქმიანობის წესსა და უფლება-მოვალეობებს.
2. სოციალურ და პოლიტიკურ მეცნიერებათა ფაკულტეტის დებულება შესასრულებლად სავალდებულოა სოციალურ და პოლიტიკურ მეცნიერებათა ფაკულტეტის ყველა სტრუქტურული ერთეულის, პერსონალისა და სტუდენტისათვის და სახელმძღვანელო დოკუმენტია თსუ ადმინისტრაციისა და სხვა სტრუქტურული ერთეულებისათის.

თავი II
ფაკულტეტის სტრუქტურა და მართვა

მუხლი 3. ფაკულტეტის სტრუქტურა

1. სოციალურ და პოლიტიკურ მეცნიერებათა ფაკულტეტი შედგება საფაკულტეტო მნიშვნელობის საგანმანათლებლო, საგანმანათლებლო-სამეცნიერო, სამეცნიერო-კვლევითი და დამხმარე სტრუქტურული ერთეულებისაგან.
2. საგანმანათლებლო-სამეცნიერო, სამეცნიერო-კვლევითი სტრუქტურულ ერთეულებს წარმოადგენს პროგრამული მიმართულებები და სამეცნიერო– ინსტიტუტები.
3. საგანმანათლებლო–სამეცნიერო სტრუქტურული ერთეულებია:
ა) პოლიტიკური მეცნიერების მიმართულება
ბ) ჟურნალისტიკის მიმართულება
გ) საერთაშორისო ურთიერთობების მიმართულება
დ) საზოგადოებრივი გეოგრაფიის მიმართულება
ე) სოციოლოგიის მიმართულება
ვ) ფსიქოლოგიის მიმართულება
ზ) სოციალური მუშაობის მიმართულება
4. ფაკულტეტის სტრუქტურულ ერთეულებს შორის კონფlიქტის წარმოშობის შემთხვევაში ფაკულტეტის დეკანი ამზადებს მარეგულირებელ დოკუმენტს უფლებამოსილებათა გამიჯვნის შესახებ, რომელსაც ამტკიცებს ფაკულტეტის საბჭო.
ასეთი დოკუმენტის არარსებობისას საკითხს წყვეტს დეკანი.

მუხლი 4. სტრუქტურული ორგანოების შექმნისა და გაუქმების წესი

უნივერსიტეტის წესდების მიხედვით-გადაწყვეტილებას საფაკულტეტო მნიშვნელობის ახალი ერთეულების შექმნის ან არსებული ერთეულების გაუქმების შესახებ შეიმუშავებს ფაკულტეტის საბჭო და დასამტკიცებლად წარუდგენს წარმომადგენლობით საბჭოს.

მუხლი 5. მართვის ორგანოები

უნივერსიტეტის ფაკულტეტის მართვის ორგანოებია – ფაკულტეტის საბჭო, დეკანი, ფაკულტეტის ხარისხის უზრუნველყოფის სამსახური