სასწავლო-სამეცნიერო ცენტრი

ივანე ჯავახიშვილის სახელობის თბილისის სახელმწიფო უნივერსიტეტის II კორპუსში NATO-ს მეცნიერება მშვიდობისთვის პროგრამის ფარგლებში გაიხსნა ქსელური ინფრასტრუქტურის პროექტით NATO-NIG №983210 გათვალისწინებული სასწავლო-სამეცნიერო ცენტრი (პროექტის ხელმძღვანელი: გიორგი ღვედაშვილი).

ცენტრს კოორდინაციას უწევს თსუ სამეცნიერო კვლევებისა და განვითარების დეპარტამენტი.

ძირითადი მიზნები:

• სამეცნიერო კვლევების მხარდაჭერა და განვითარება საუნივერსიტეტო განათლების ხარისხის ამაღლების მიზნით, რათა მეცნიერებისთვის შეიქმნას ხელსაყრელი პირობები მათ წინაშე მდგომი ამოცანების წარმატებით გადაწყვეტისთვის: უზრუნველყოს ისინი საჭირო მატერიალურ-ტექნიკური ბაზით, თანამედროვე სამეცნიერო ინფორმაციით და ხელი შეუწყოს, როგორც შიდა, ასევე, საერთაშორისო თანამშრომლობას. 
• სამეცნიერო კვლევებისა და საუნივერსიტეტო განათლების ინტეგრაცია: ამ მხრივ, ცენტრის სასწავლო-საგანმანათლებლო საქმიანობა მიმართული იქნება კონცეპტუალური მსოფლმხედველობის მქონე ახალი ტიპის მაღალკვალიფიციურ სპეციალისტთა მომზადებასა და მათი შემოქმედებითი პოტენციალის განვითარებაზე, რომლებიც შეძლებენ, გადაწყვიტონ თანამედროვე მეცნიერების წინაშე არსებული პრობლემები მოწინავე ტექნოლოგიების გამოყენებით.
• თანამედროვე საკომუნიკაციო ინფრასტრუქტურის განვითარება, რაც უზრუნველყოფს საერთაშორისო ქსელებთან კავშირს; დამოუკიდებელი სამუშაო პირობების შექმნა სტუდენტებისა და ახალგაზრდა მეცნიერთათვის. 
• დისტანციური და ელექტრონული სწავლების დანერგვა: ამ მხრივ პროექტში გათვალისწინებულია რამდენიმე სასწავლო ელექტრონული კურსის შექმნა და დისტანციური ცენტრის ამოქმედება.
• სამეცნიერო კარიერის პრესტიჟის ამაღლება და პოპულარიზაცია ახალგაზრდა თაობისთვის. მსოფლიოს წამყვან უნივერსიტეტებთან და სამეცნიერო ცენტრებთან   პარტნიორობით ახალგაზრდა სპეციალისტების პროფესიული ზრდის, მეცნიერ-მკვლევართა მხარდაჭერის პროგრამების განხორციელება   (სტაჟირება, სწავლება, სამეცნიერო გაცვლები სტუდენტებისა და დოქტორანტების მონაწილეობით, ერთობლივი სამეცნიერო კვლევები, ერთობლივი გრანტები და სტიპენდიები, წამყვანი სპეციალისტების მოწვევა ლექცია-სემინარების ჩატარების მიზნით და ა.შ. )