საბაკალავრო პროგრამის ფორმატი

თსუ ფაკულტეტები სტუდენტებს საბაკალავრო პროგრამების, ანუ სპეციალობების დიდ არჩევანს სთავაზობენ. ფაკულტეტების აბსოლუტური უმრავლესობა სტუდენტებს საშუალებას აძლევს, დაეუფლოს როგორც ძირითად (ე. წ. major), ისე დამატებით (minor) სპეციალობებს. დამატებითი სპეციალობის არჩევა დასაშვებია როგორც ძირითადი ფაკულტეტის ფარგლებში, ასევე თსუ–ს სხვა ფაკულტეტებზეც (თუ აღნიშნულ დამატებით სპეციალობას რაიმე შეზღუდვა არ გააჩნია). გამონაკლისია იურიდიული და მედიცინის ფაკულტეტები, ჰუმანიტარულ მეცნიერებათა ფაკულტეტის დაწყებითი განათლების საბაკალავრო პროგრამა, სადაც სტუდენტები ეუფლებიან მხოლოდ ერთ, ე. წ. რეგულირებად სპეციალობას.
ძირითადი სპეციალობა (major) – სტუდენტისათვის მაპროფილებელი სპეციალობაა, რომელშიც მას ბაკალავრის აკადემიური ხარისხი ენიჭება. ძირითადი სპეციალობის განმსაზღვრელ საგნებს ეთმობა არანაკლებ 120 კრედიტისა.
დამატებითი სპეციალობა (minor) სტუდენტს არ ანიჭებს აკადემიურ ხარისხს. დამატებითი სპეციალობის წყალობით სტუდენტი იძენს გარკვეულ საბაზო დარგობრივ ცოდნას, ზოგად და დარგობრივ კომპეტენციებს, რომლებიც ეხმარება მას შრომის ბაზარზე და სწავლების შემდგომ საფეხურზე. დამატებითი სპეციალობა მოიცავს არანაკლებ 60 კრედიტისა.
შესაძლებელია ორი ძირითადი ან ერთი ძირითადი და ორი დამატებითი სპეციალობის კომბინაცია ერთი ფაკულტეტის და მონათესავე სპეციალობების (ერთი აკადემიური ხარისხის) ფარგლებში (განსაკუთრებით ჰუმანიტარულ და სოციალურ მეცნიერებათა ბაკალავრის აკადემიური ხარისხის მიმნიჭებელ პროგრამებში). ძირითადი და დამატებითი სპეციალობის (სპეციალობების) არჩევის საკითხს წყვეტს სტუდენტი.